జనగామ అర్బన్, వెలుగు: ఈ ఏడాది పది ఫలితాల్లో వంద శాతం ఉత్తీర్ణత సాధించేందుకు కృషి చేయాలని జనగామ కలెక్టర్ రిజ్వాన్ బాషా షేక్ అన్ని మండలాల విద్యాధికారులను, పాఠశాలల హెచ్ఎంలను ఆదేశించారు. మంగళవారం కలెక్టరేట్లో విద్యాశాఖ ఆధ్వర్యంలో కలెక్టర్అన్ని మండలాల ఎంఈవోలు, హెచ్ఎంలతో సమీక్ష నిర్వహించారు. విజయోస్తు కార్యక్రమంలో భాగంగా ఈ ఏడాది పది ఫలితాల్లో వంద శాతం ఉత్తీర్ణత సాధించాలని, స్డడీ ఆవర్స్లో అన్ని సబ్జెక్టులపై పూర్తిస్థాయిలో సాధన చేయించాలని, వసతి గృహాల్లోని వార్డెన్లు విద్యార్థులపై ప్రత్యేక శ్రద్ద తీసుకోవాలని సూచించారు. ఫిబ్రవరి 3న అన్ని ప్రభుత్వ పాఠశాలల పదో తరగతి విద్యార్దులకు మాక్టెస్ట్నిర్వహిస్తామని తెలిపారు. ప్రజ్ఞోత్సవ కార్యక్రమంలో భాగంగా ఒకటో తరగతి నుంచి 5వ తరగతి వరకు చదువుతున్న విద్యార్థులకు మండల స్థాయిలో నృత్యమేళా, వ్యాసరచన, తదితర కార్యక్రమాలను నిర్వహించనున్నట్లు వివరించారు. సమీక్షలో డీఈవో రమేశ్, జీసీడీవో గౌసియా బేగం తదితరులు పాల్గొన్నారు.
